வெளியூரில் இருக்கும் குடும்பத்தினர் பார்ப்பதற்காக ஜனாஸாவின் நிகழ்வுகளை வீடியோ காட்டுவது அடிப்படையில் ஹலால்தான். மார்க்க ரீதியாக அதில் பிழையில்லை. ஆனால் இதில் மிகவும் கவனமாக இருக்க வேண்டிய சில விஷயங்கள் உள்ளன.
முதலாவதாக, நாம் பார்ப்பது 'நஃயீ' ஆக மாறிவிடக் கூடாது. நஃயீ என்றால் ஜனாஸாவை வைத்துப் புகழ் பாடுதல் அல்லது ஜனாஸாவை வைத்துப் பிரபல்யம் தேடுதல் ஆகும். மரணித்த செய்தியை உலகத்துக்கெல்லாம் பரப்பி, சம்பந்தம் இல்லாத முகநூல், வாட்ஸ்அப்பில் லைவ் (Live) செய்வது முற்றிலும் தவிர்க்கப்பட வேண்டும். மரணச் செய்தி சம்பந்தப்பட்டவர்களுக்கு மட்டும் தான் சொல்லப்பட வேண்டும். பள்ளியில் அறிவிப்பது கூட ரசூல் (ஸல்) காலத்தில் இல்லாத ஒன்றுதான்; எனினும் ஊர் மக்களுக்குத் தெரிய வேண்டும் என்பதற்காக இன்று அறிவிக்கப்படுகிறதே தவிர, உலகமெல்லாம் லைவ் செய்வது தவறானதாகும்.
இரண்டாவதாக, வெளிநாட்டில் உள்ள குடும்பத்தினர் வீடியோவில் பார்த்து அவர்களுக்காகத் துஆ செய்வதோடு நிறுத்திக் கொள்ள வேண்டும். அன்றைக்கு நாம் லைவாகப் பார்த்தோமா, துஆ செய்தோமா, அதோடு அந்த வீடியோ ரெக்கார்டிங்கை அழித்துவிட வேண்டும். அதை ஒரு ஞாபகார்த்தமாக வைத்துப் பின்னால் வரும் சந்ததியினருக்கு ஒரு நூதனப் பொருளாகவோ, வரலாற்றுப் பதிவாகவோ சேமித்து வைக்கும் கெட்ட வழமை உருவாகிவிடக் கூடாது. துஆ செய்வதோடு நிறுத்திக் கொள்வதுதான் மிகவும் சிறப்பானது.