ஆண்கள் தோள்புஜம் வரைக்கும் முடியை நீளமாக வளர்த்து வைப்பதோ, அதனைக் கட்டி வைத்துக் கொள்வதோ மார்க்க ரீதியாகத் தடை இல்லை. ஆனால், அந்த முடி வளர்த்தல் என்பது பெண்களுக்கு ஒப்பான ஒரு நிலைக்கு வந்துவிடக் கூடாது. ரசூலுல்லாஹி (ஸல்) அவர்கள் பெண்களுக்கு ஒப்பாக நடக்கக்கூடிய ஆண்களைச் சபித்திருக்கிறார்கள்.
சிலர் முடியை வளர்த்துவிட்டு, நடுவால இரண்டாகப் பிரித்து (வகுடு எடுத்து) பெண்கள் போல வாரி நடந்து கொள்வார்கள். பெண்களைப் போல கொண்டை கட்டி வைத்துக் கொள்வார்கள் அல்லது பின்னிக் கொள்வார்கள். இதுபோன்ற நடைமுறைகள் நடக்குமாக இருந்தால் அது முற்றிலும் தவறாகும். அப்படி அல்லாமல், முடியை வளர்த்து பின்னால கட்டிக்கொண்டு ஆண்களுக்கே உரிய ஸ்டைலில் வைத்துக் கொண்டால் மார்க்க ரீதியாக அது தடை இல்லை.
ஆனால், இன்றைய காலகட்டத்தில் இதில் இன்னொரு விஷயத்தையும் நாம் அவதானிக்க வேண்டி இருக்கிறது. இதைச் சிலர் நடிகர்களுக்கு ஒப்பாகவோ அல்லது ரவுடிகளுக்கு ஒப்பாகவோ நடந்து கொள்ள வேண்டும் என்ற எண்ணத்தில் செய்கிறார்கள். தான் ரவுடிசம் செய்ய வேண்டும் என்ற எண்ணத்தில் முடி வளர்க்கிறார்கள். "யார் எந்த சமுதாயத்திற்கு ஒப்பாக நடக்கிறாரோ, அவர் அந்த சமுதாயத்தையே சார்ந்தவர்" என்று ரசூல் (ஸல்) அவர்கள் எச்சரித்துள்ளார்கள். அந்தத் தண்டனைக்குள்ளாக வரக்கூடிய மக்களாக நாம் ஆகிவிடக் கூடாது.
எனவே, முடி வளர்க்கலாம் என்ற அடிப்படையில் முடியை வளர்த்து முறையாகப் பேணி இருப்பதில் தவறில்லை. ஆனால், இன்னொரு கெட்ட சமுதாயத்திற்கு ஒப்பாகும் எண்ணத்திலேயோ அல்லது ஒரு பெண்ணைப் பிரதிபலிக்கும் வகையிலேயோ அந்த முடியை அமைத்துக் கொள்வது மார்க்கத்தில் தடையாகும்.