ஆண்கள் அரைக்கை அல்லது கைகளற்ற டீ-சர்ட்டுகளை அணிவதற்கு மார்க்க ரீதியாக நேரடியான தடைகள் ஏதுமில்லை. ஆண்களுக்குரிய அவ்ரத் மறைக்கப்பட்டிருந்தால் அந்த ஆடை மார்க்க ரீதியாக அனுமதிக்கப்பட்டதேயாகும்.
இருந்தபோதிலும், ஒரு முஸ்லிம் பேண வேண்டிய பொது ஒழுக்கங்கள் மற்றும் கண்ணியம் (முரூஆ) என்ற ஒரு பகுதி மார்க்கத்தில் உள்ளது. "ஒவ்வொரு பள்ளிவாசலிலும் உங்களது அலங்காரங்களை எடுத்துக் கொள்ளுங்கள்" என்று குர்ஆன் கூறுகிறது. ஒரு திருமண வைபவத்துக்கோ அல்லது ஒரு கௌரவமான சபைக்கோ செல்லும்போது எப்படி கண்ணியமான ஆடைகளை அணிந்து செல்கிறோமோ, அதைவிட அதிகமான கண்ணியத்தை பள்ளிவாசலுக்கும் மார்க்க சபைகளுக்கும் வழங்க வேண்டும். அதைவிடுத்து, பள்ளிவாசலுக்கு வரும்போது இது போன்ற கைகளற்ற ஆடைகளை அணிந்து வருவது, மார்க்கத்தின் மீதான அவரது மரியாதையின்மையையும் ஆன்மீக வீழ்ச்சியையுமே காட்டுகிறது.
மேலும், திரைப்பட நடிகர்கள் அல்லது ரவுடிகள் போன்றவர்களை முன்மாதிரியாகக் கொண்டோ அல்லது அவர்களது கலாச்சாரத்தை (Trend) பிரதிபலிக்கும் நோக்கத்திலோ இது போன்ற ஆடைகளை அணிந்தால் அது மார்க்கத்தில் குற்றமாகிவிடும். "யார் எந்த சமுதாயத்திற்கு ஒப்பாக நடக்கிறாரோ அவர் அந்த சமுதாயத்தையே சார்ந்தவர்" என்ற நபிமொழியின் அடிப்படையில் அது தடைசெய்யப்பட்டதாக மாறிவிடும். எனவே, ஆடை அனுமதிக்கப்பட்டதாக இருந்தாலும், அணியும் இடத்தின் கண்ணியம் மற்றும் அணியும் நோக்கம் ஆகியவற்றைக் கருத்தில் கொண்டு கண்ணியமான ஆடைகளையே தேர்வு செய்ய வேண்டும்.