நோன்பாளி பல் துலக்குவதால் நோன்பு முறியாது. ரசூல் (ஸல்) அவர்கள் மிஸ்வாக் செய்வதை மார்க்கத்தில் பெரிதும் வலியுறுத்தி உள்ளார்கள். அது ரமழானுக்கோ அல்லது நோன்பாளிக்கோ தவிர்க்கப்பட வேண்டும் என ஹதீஸ்களில் எந்த நிபந்தனையும் இல்லை.
நபிகள் நாயகம் (ஸல்) அவர்கள், "என் சமுதாயத்திற்குச் சிரமமாக இல்லை என்றால், ஒவ்வொரு தொழுகைக்கும் மிஸ்வாக் செய்ய ஏவியிருப்பேன்" என்று கூறினார்கள். எனவே நோன்பாளியாக இருந்தாலும் பல் துலக்குவதில் எவ்விதத் தவறும் இல்லை.
எனினும், தற்காலத்தில் நாம் பயன்படுத்தும் பற்பசைகளில் (Toothpaste) சுவை இருப்பதனால், அதனைப் பயன்படுத்தும் போது எச்சிலுடன் கலந்து அந்தச் சுவை தொண்டை வழியாக உள்ளே சென்றுவிடாதவாறு நாம் மிகவும் கவனமாக இருக்க வேண்டும். குறிப்பாகச் சிறுவர்களுக்கு இதைக் கற்றுக் கொடுக்க வேண்டும். இந்தச் சுவை தொண்டைக்குள் செல்லாத வரையில், பற்பசை கொண்டு பல் துலக்குவதில் மார்க்க ரீதியாக எவ்விதத் தடையுமில்லை.