ஒரு முஸ்லிம் தொழாமல் இருப்பது மிகப்பெரிய குற்றமாகும். அது ஈமானுக்கும் குஃப்ருக்கும் இடையிலான வித்தியாசம் என நபி (ஸல்) அவர்கள் குறிப்பிட்டுள்ளார்கள். ஆனால், தொழாத ஒருவருக்கு வாரிசுரிமைச் சொத்தில் பங்கு சேராது என்றோ, அவரது மனைவி விவாகரத்தாகி விடுவார் என்றோ கூறுவது தவறான நிலைப்பாடாகும்.
ஒருவர் தொழுகையை விட்டால் அவர் இஸ்லாத்தை விட்டே வெளியேறிவிடுவாரா என்பதில் மார்க்க அறிஞர்களுக்கு மத்தியில் கருத்து முரண்பாடு உள்ளது. ஷைக் உஸைமீன் (ரஹ்) போன்ற அறிஞர்கள், முற்றிலுமாகத் தொழுகையை நிராகரிக்காமல், சோம்பேறித்தனத்தினால் விட்டு விட்டுத் தொழுபவர் காஃபிராக மாட்டார் எனக் கூறியுள்ளனர். எனவே, இந்த முரண்பாடான சட்டத்தை வைத்துக்கொண்டு, ஒரு வாரிசுக்குச் சொத்து கிடைக்காது என மறுக்கவோ அல்லது அவரது சொத்து மற்றவர்களுக்குப் போய்ச் சேரும் என எண்ணவோ கூடாது.
அவர் தொழாதவராக இருந்தாலும், இஸ்லாமியச் சட்டப்படி அவருக்குரிய சொத்துப் பங்கு நிச்சயமாக வழங்கப்படும்.