இஸ்லாமிய மார்க்கத்தில் ஹலால், ஹராம் என்று இருப்பதைப் போல 'மக்ரூஹ்' (வெறுக்கத்தக்கது) என்ற சட்டம் ஏதேனும் உள்ளதா?

இஸ்லாமிய ஃபிக்ஹ் (சட்டக் கலை) அடிப்படையில் 'மக்ரூஹ்' (வெறுக்கத்தக்கவை) என்ற ஒரு சட்டம் இருப்பது உண்மையாகும். அதற்கான மார்க்க ஆதாரங்களும் உள்ளன.

மக்ரூஹ் என்பது ஹராம் (முற்றிலும் தடைசெய்யப்பட்டது) அல்ல. ஆனால், இஸ்லாமிய ஷரீஅத் ஒன்றை அனுமதித்திருந்தாலும், அதனைச் செய்வதையோ அல்லது தொடர்ந்து செய்வதையோ இஸ்லாம் அல்லது நபிகள் நாயகம் (ஸல்) அவர்கள் வெறுத்திருந்தால் அது மக்ரூஹ் என்று அழைக்கப்படும். (உதாரணமாக, குடும்ப வாழ்க்கையில் ஈடுபடுகின்ற பொழுது ஒரு சில குறிப்பிட்ட செயல்களை நபி (ஸல்) அவர்கள் வெறுத்ததை ஹதீஸ்களில் காணலாம்).

எனவே மக்ரூஹ் என்ற சட்டப் பிரிப்பு இஸ்லாத்தில் உள்ளது. ஆனால், இன்று சிலர் 'மக்ரூஹ்' என்ற பெயரில் மார்க்கத்தில் இல்லாத பல புதிய நிபந்தனைகளை (உதாரணமாக: தரையிலும் கடலிலும் வாழும் பிராணிகளை 40 நாள் தொடர்ந்து சாப்பிடக்கூடாது என்பது போன்ற மூடநம்பிக்கைகளை) தாங்களாகவே சேர்த்துக் கொள்கிறார்கள்; இதற்கு எவ்வித மார்க்க ஆதாரமும் கிடையாது. சுருக்கமாக, மார்க்க ஆதாரங்களின் அடிப்படையில் அமைந்த மக்ரூஹ் என்ற சட்டப் பிரிப்பு மார்க்கத்தில் உள்ளதேயாகும்.