ஹஜ் கடமையை நிறைவேற்றாமல் ஒரு நபர் உம்ரா செய்யலாமா?

ஹஜ்ஜுக்கான பொருளாதார மற்றும் உடல் வசதி இருந்தும், கோட்டா கிடைக்க தாமதமாகும் சூழ்நிலையிலோ அல்லது முறையாக விண்ணப்பித்து இரண்டு மூன்று வருடங்கள் காத்திருக்க வேண்டிய நிலையிலோ ஒருவர் இருந்தால், அவர் தாராளமாக ஹஜ்ஜுக்கு முன்பாக பல முறை உம்ராக்களைச் செய்யலாம்; அதில் எந்தப் பிழையும் கிடையாது. நபி (ஸல்) அவர்கள் கூட ஹஜ் செய்வதற்கு முன்பாக மூன்று முறை உம்ரா செய்துள்ளார்கள். எனவே, உம்ரா நிறைவேறுவதற்கு ஹஜ் செய்திருக்க வேண்டும் என்ற எந்த நிபந்தனையும் இல்லை.

ஆனால், தனக்கு ஹஜ் செய்வதற்கான முழுமையான வாய்ப்பும் சந்தர்ப்பமும் இருந்தும், ஹஜ்ஜைப் புறக்கணித்துவிட்டு அதற்குப் பகரமாக உம்ரா செய்தால் போதும் என்ற எண்ணத்தில் செல்வதோ அல்லது ஹஜ்ஜின் சீசனில் சென்றுவிட்டு ஹஜ் செய்யாமல் உம்ரா மட்டும் செய்துவிட்டுத் திரும்புவதோ முற்றிலும் தவறாகும்.