துஆவின் மூலம் கழா கத்ரில் (விதியில்) மாற்றங்கள் ஏற்படும் என்பதைப் பல ஹதீஸ்கள் தெளிவாக உறுதிப்படுத்துகின்றன. இதனை நாம் எவ்வாறு புரிந்து கொள்ள வேண்டும் என்றால், இறைவனின் பிரதான ஏடான "லவ்ஹுல் மஹ்ஃபூழ்" (பாதுகாக்கப்பட்ட மூலப்பலகை) என்பதில் எவ்வித மாற்றமும் ஏற்படாது. ஆனால், மலக்குமார்களின் கைகளில் உள்ள வருடாந்த அல்லது நாளாந்த ஏடுகளில் இறைவன் துஆவின் காரணமாக மாற்றங்களை ஏற்படுத்துவான்.
அல்குர்ஆனில் அல்லாஹ், "அல்லாஹ் தான் நாடியதை அழிப்பான்; நாடியதை நிலைநிறுத்துவான். அவனிடமே உம்முல் கிதாப் (மூலப் புத்தகம்) உள்ளது" எனக் கூறுகிறான். உதாரணமாக, ஒருவருக்கு ஒரு நோய் அல்லது துன்பம் வருவதாக மலக்குமார்களின் ஏடுகளில் எழுதப்பட்டிருக்கலாம். ஆனால், அவர் உள்ளமுருகிக் கேட்கின்ற துஆவின் காரணமாக அல்லாஹ் அந்தத் துன்பத்தை அவரை விட்டும் நீக்கிவிடுவான். துஆ கேட்காதிருந்தால் அத்துன்பம் அவரை வந்தடைந்திருக்கும். அந்த துஆவைக் கேட்பார் என்பதும் இறைவனின் பிரதான ஏட்டில் எழுதப்பட்டிருக்கும்.
கழா கத்ர் (விதி) மற்றும் மனித சுதந்திரம் ஆகியவற்றுக்கு இடையிலான தொடர்பு என்பது இந்த உலகத்தில் முழுமையாக விளங்கிக் கொள்ள முடியாத ஒரு இறை இரகசியமாகும்; அது மறுமையில்தான் மனிதர்களுக்கு முழுமையாகத் தெளிவாகும். எனவே, விதியை மாற்றுவதற்குத் துஆ ஒரு சிறந்த ஆயுதம் என்பதை நம்பி நாம் தொடர்ந்து இறைவனிடம் பிரார்த்திக்க வேண்டும்.