உடும்பு உண்பது ஹராம் என்று பரப்பப்படும் தகவல் முற்றுமுழுதாகத் தவறானதாகும். அரபியில் "ளப்" (Dhab) என்று அழைக்கப்படும் பிராணியே தமிழிலும் சிங்களத்திலும் உடும்பு என்று அழைக்கப்படுகிறது. அரபு நாடுகளில் உள்ள உடும்பு வேறு, நமது நாடுகளில் உள்ளது வேறு என்று கூறுவதற்கு எவ்வித அடிப்படையும் இல்லை. உடும்பு என்பது தாவர உண்ணியாக இருந்தாலும், சிறிய பூச்சி புழுக்களையும் உண்ணக்கூடிய இயல்புடையதாகும். பூச்சிகளை உண்கிறது என்ற காரணத்திற்காக ஒரு பிராணியை ஹராம் ஆக்க முடியாது; கோழியும் பூச்சிகளை உண்டுதான் வளர்கிறது.
மேலும், உடும்பை "கபறகாயா" (Water Monitor / வரல்) இனத்தோடு ஒப்பிடுவதும் பெரும் பிழையாகும். கபறகாயா என்பது கொடூரமான தன்மையுடையது, அதன் கூடுகளை உடைத்து உண்ணும் தன்மையுடையது. ஆனால் உடும்பு அப்பாவித்தனமானது. தோற்ற ஒற்றுமையையோ அல்லது பெயரொற்றுமையையோ வைத்து மார்க்கச் சட்டங்களை மாற்றிவிட முடியாது. கபறகாயா (வரல்) என்பதைச் சாப்பிடுவது கூட இஸ்லாமிய அறிஞர்களுக்கு மத்தியில் நேரடியாக ஹராம் என்று ஒருமனதாகத் தடை செய்யப்படவில்லை, அதிலும் கருத்து முரண்பாடுகள் உள்ளன.
எனவே, நபிகள் நாயகம் (ஸல்) அவர்கள் நேரடியாகத் தடை செய்யாத எந்த ஒன்றையும் நாமாகவே ஹராம் (தடுக்கப்பட்டது) என்று கூறுவது மார்க்கத்தில் குற்றமாகும். உடும்பு உண்பது மார்க்க ரீதியாக அனுமதிக்கப்பட்ட (ஹலால்) ஒன்றேயாகும்.