ஆல்கஹால் கலந்த வாசனைத் திரவியங்களைப் பயன்படுத்துவது குறித்து இஸ்லாமிய அறிஞர்களிடையே கருத்து வேறுபாடுகள் காணப்படுகின்றன. ஒரு சாரார் ஆல்கஹால் நஜீஸானது (அசுத்தமானது) மற்றும் ஹராமானது என்ற அடிப்படையில், அவற்றைப் பயன்படுத்தக் கூடாது என்று கருதுகிறார்கள். ஆல்கஹாலில் பிரதானமாக இரண்டு வகைகள் உள்ளன. அந்த ஆல்கஹால் போதையை உண்டாக்கக்கூடிய வகையாக இருக்குமாக இருந்தால், அந்த பெர்ஃபியூம் அல்லது ஸ்ப்ரேயைப் பயன்படுத்தக் கூடாது என்று வேறுசிலர் கூறுகின்றனர். நவீன கால அறிஞர்கள் பலரும் இக்கருத்தையே முன்வைக்கின்றனர்.
ஆல்கஹால் நஜீஸா இல்லையா என்ற வாதத்தில், அது நஜீஸ் அல்ல என்பதே மிகச் சரியான (ராஜிஹான) கருத்தாகும். நஜீஸ் அல்லாமல் இருந்தாலும், அந்த ஆல்கஹால் போதையை ஏற்படுத்தக்கூடியதாக இருந்தால் அதைப் பயன்படுத்தக் கூடாது. போதையை ஏற்படுத்தாத ஆல்கஹாலாக இருந்தால், அதைத் தாராளமாகப் பயன்படுத்தலாம் என்பதே நவீன கால இஸ்லாமிய அறிஞர்களில் ஒரு சாரார் வழங்கிய மார்க்கத் தீர்ப்பாகும் (ஃபத்வா). இதுவே மிகச் சரியான கருத்தாகும்.