\nமௌலூத் ஓதும் இமாமுக்கு பின்னால் நின்று தொழலாமா? முந்தைய பதிலில் உள்ள சந்தேகம் என்ன?

மார்க்கத்தை கண்மூடித்தனமாகப் பின்பற்றக்கூடாது. நமக்கு பிடித்தவர்கள் சொல்லுகிறார்கள் என்பதற்காகவோ உணர்ச்சிவசப்பட்டோ மார்க்கத்தை அணுகக்கூடாது, குர்ஆன் சுன்னா அடிப்படையில் அணுக வேண்டும். இஸ்லாத்தை விட்டு வெளியேற்றக்கூடிய பித்அத்தை (ஷிர்க்) செய்கிற இமாமுக்கு பின்னால் நின்று தொழக்கூடாது. இஸ்லாத்தை விட்டு வெளியேற்றாத பித்அத் செய்கிற இமாமுக்கு பின்னால் நின்று தொழலாம்.

மௌலூத் என்பது நபிகள் நாயகம் (ஸல்) அவர்களைப் புகழ்வதாக நினைத்து உருவாக்கப்பட்ட பித்அத் ஆகும். ஆனால் மௌலூதை அவர் படிக்கிற காரணத்தினால் அவர் இஸ்லாத்தை விட்டு வெளியே போகமாட்டார். சவூதி அரேபியாவில் இருந்த ஷேக் இப்னு பாஸ் (ரஹ்), ஷேக் உஸைமீன் (ரஹ்) போன்ற பெரிய அறிஞர்கள் கூட ஒரு இடத்திலும் "மௌலூத் ஓதுகிற இமாமுக்கு பின்னால் நின்று தொழக்கூடாது" என்று சொன்னதே கிடையாது. மௌலூத் ஓதுவது வழிகேடு (பித்அத்), ஆனால் அது இஸ்லாத்தை விட்டு வெளியேற்றுகிற ஒரு பித்அத் கிடையாது. எனவே மௌலூத் ஓதுகிற ஒரு இமாமுக்கு பின்னால் நின்று தொழலாம்.

ஆனால், உங்களுக்கு குர்ஆன் சுன்னா அடிப்படையில் தொழுகை நடத்தும் ஒரு பள்ளியும், மௌலூத் ஓதும் இமாம் உள்ள பள்ளியும் அருகருகே இருந்தால், நீங்கள் சுன்னா அடிப்படையில் தொழக்கூடிய பள்ளிக்கு முன்னுரிமை கொடுத்து அங்குதான் செல்ல வேண்டும். வேறு இமாம்களே இல்லை என்ற சூழ்நிலையில், அந்த இமாம் செய்யும் பித்அத் இஸ்லாத்தை விட்டு வெளியேற்றாத பாவமான பித்அத் என்றால் அவருக்கு பின்னால் நின்று தொழுங்கள். இஸ்லாத்தை விட்டு வெளியேற்றக்கூடிய ஷிர்க்கான பித்அத் என்றால் (உதாரணமாக ரசூல் (ஸல்) அவர்களுக்குப் பின்னால் நபி வரலாம் என்றோ, அல்லாஹ் எல்லாப் பொருட்களிலும் ஊடுருவி இருக்கிறான் என்றோ கொள்கை இருந்தால்) அவரை விட்டு ஒதுங்குங்கள்.