அரவாணிகள் (திருநங்கைகள் / திருநம்பிகள்) யார்? அவர்களுக்கான மார்க்க சட்டம் மற்றும் திருமணச் சட்டங்கள் என்ன?

அரவாணிகள் அல்லது திருநங்கைகள் என அழைக்கப்படுபவர்கள் குறித்து இஸ்லாமிய மார்க்கம் தெளிவான இரு வேறு பிரிவுகளைக் கையாள்கிறது. இதை அரபியில் ''முஹன்னஸ்'' என்று குறிப்பிடுவார்கள். இதைப் புரிந்து கொள்ள உடல் ரீதியான மாற்றம் உள்ளவர்கள், மற்றும் உடல் ரீதியான மாற்றம் இன்றி நடிப்பவர்கள் என இரு வகையாகப் பிரிக்க வேண்டும்.

1. உடல் ரீதியான குறைபாடுகளுடன் பிறப்பவர்கள் (குன்ஸா முஷ்கில்):
பிறப்பிலேயே உடல் ரீதியாக ஆண் மற்றும் பெண் இருபாலின உறுப்புகளோடும் அல்லது உறுப்புகளை அடையாளப்படுத்த முடியாத நிலையிலும் பிறப்பவர்கள் இதில் அடங்குவர். இவர்கள் எந்தப் பக்கம் தங்களது உணர்வும் சாய்வும் இருக்கிறது என்பதை அவர்களே வெளிப்படுத்த வேண்டும். அவர்கள் தங்களை ஆணாக உணர்ந்தால் அவர்களுக்குப் பெண்ணைத் திருமணம் செய்து வைக்கலாம், பெண்ணாக உணர்ந்தால் ஆணைத் திருமணம் செய்து வைக்கலாம். ஒருவேளை எவ்விதத்திலும் அடையாளப்படுத்த முடியாத, இரு உணர்வுகளும் சரிசமமாக இருக்கும் 5 சதவீதமான முஷ்கில்களாக இருந்தால், அவர்களுக்குத் திருமணம் முடிப்பது ஹராமாகும். ஆனால் இஸ்லாம் இவர்களை ஒதுக்கச் சொல்லவில்லை. அவர்களுக்குரிய சொத்துரிமைகள் மற்றும் அனைத்து உரிமைகளும் வழங்கப்படும். இவர்கள் அங்கவீனத்தால் சோதிக்கப்பட்டவர்களைப் போல (23வது குரோமோசோம் குறைபாட்டால்) சோதிக்கப்பட்டவர்கள். இவர்கள் பொறுமைகாத்தால் மறுமையில் அதற்கான கூலி நிச்சயமாகக் கிடைக்கும்.

2. உடல் மாற்றமின்றி எதிர் பாலினத்தவர் போல நடிப்பவர்கள்:
இரண்டாவது வகை, உடல் ரீதியாக முழுமையான ஆணாக இருந்துகொண்டு பெண்களைப் போல ஆடை அணிந்து, பெண்களைப் போல பேசுபவர்கள் அல்லது பெண்ணாக இருந்து கொண்டு ஆணைப் போல நடப்பவர்கள். இது ஒரு மனநோய் (Psychological disease). இவர்களைத்தான் நபிகள் நாயகம் (ஸல்) அவர்கள் வன்மையாகச் சபித்தார்கள்; மேலும் இவர்களை வீடுகளை விட்டு வெளியேற்றுமாறு கூறினார்கள். உம்மு ஸலமா (ரழி) அவர்களது வீட்டில் பெண் தோற்றத்தில் இருந்த ஒரு ஆண், பெண்களின் அங்கங்களை வர்ணித்த போது நபிகளார் அவனை உள்ளே நுழையக் கூடாது எனத் தடுத்தார்கள். எனவே, உடல் ரீதியான எவ்விதக் குறைபாடும் இன்றி எதிர் பாலினத்தவரைப் போல நடிப்பவர்களை இஸ்லாம் வன்மையாகக் கண்டிக்கிறது. இவர்களுக்கு ''திருநங்கை'' போன்ற கௌரவப் பெயர்களைச் சூட்டி தவறான வழிகளுக்குப் பயன்படுத்துவதை இஸ்லாம் ஒருபோதும் அங்கீகரிக்காது. இவர்கள் தங்களது உண்மையான உடல் அடையாளத்துக்கு ஏற்ப தங்களது பழக்கவழக்கங்களை மாற்றிக் கொள்ள முயற்சிக்க வேண்டும்.