தொழுது கொண்டிருக்கும் போது ஒரு பள்ளிவாசலின் அதான் சத்தம் கேட்டால், அதற்காக தொழுகையை முறிக்கவோ அல்லது இடையில் விடவோ வேண்டிய அவசியமில்லை. அதான் ஒலிக்கின்ற நேரத்திலும் ஒருவர் தாராளமாகத் தொழலாம்; அதில் மார்க்க ரீதியாக எந்தத் தவறும் கிடையாது.
தொழுகையின் நேரம் வந்துவிட்டால் அதான் ஒலித்துக் கொண்டிருக்கும் போதே சுன்னத்தான தொழுகைகளைத் தொழுவதும் மார்க்கத்தில் பிழையானதல்ல. ஆனால் நாம் ஏன் அவ்வாறு தொழாமல் இருக்கிறோம் என்றால், அதானுக்குப் பதில் கூறி, அதன் பின்னரான துஆவைக் கேட்டால் அதற்கென பிரத்தியேகமான சிறப்பான நன்மைகள் மார்க்கத்தில் வாக்களிக்கப்பட்டுள்ளன. அத்தகைய ஒரு சிறப்பான நன்மையை நாம் ஏன் தவறவிட வேண்டும் என்பதற்காகவே நாம் அதான் சொல்லும் போது தொழாமல் பொறுத்திருக்கிறோம்.
இந்த அடிப்படையைப் புரிந்து கொண்டோம் என்றால், தொழுது கொண்டிருக்கும் போது இன்னொரு பள்ளியின் அதான் சற்றுத் தாமதமாகக் கேட்டால், அதற்காகப் பாதியிலேயே தொழுகையை விடத் தேவையில்லை என்பதைத் தெளிவாகப் புரிந்து கொள்ளலாம்.