இஸ்லாமிய மார்க்கத்தின் பிரதான அடிப்படைகளில் ஒன்று, பிறப்பால் எந்த மனிதனும் உயர்ந்தவனோ அல்லது தாழ்ந்தவனோ கிடையாது என்பதாகும். இஸ்லாத்தில் யாராலும் ஒரு மனிதனை ஜாதியின் அடிப்படையில் உயர்ந்தவன் என்றோ தாழ்ந்தவன் என்றோ பிரிக்க முடியாது. மாற்று மதங்களில் உள்ளதைப் போன்று இஸ்லாத்தில் ஜாதி பேதம் இருக்கிறது என்று யாராவது சொன்னால், அது இஸ்லாத்தின் அடிப்படைக் கொள்கைக்கே நேர் முரணான ஒரு அப்பட்டமான பொய்யாகும்.
அப்படியென்றால் முஸ்லிம்களுக்கு மத்தியில் ஷியா, சுன்னி, தப்லீக் ஜமாஅத், தரீக்கா போன்ற பல்வேறு பிரிவுகள் காணப்படுகின்றனவே, இவைகள் ஜாதிப் பிரிவுகள் இல்லையா என்ற கேள்வி சிலருக்கு எழலாம். நிச்சயமாக இவைகள் எதுவும் ஜாதி ரீதியான பிரச்சனைகளோ அல்லது பிரிவுகளோ கிடையாது. இந்த வேறுபாடுகளை நீங்கள் எவ்வாறு புரிந்து கொள்ள வேண்டும் என்றால், மாற்று மதங்களில் உள்ள "வடகலை நாமம், தென்கலை நாமம்" போன்ற கொள்கை ரீதியான முரண்பாடுகளாகவே இதனைப் புரிந்து கொள்ள வேண்டும்.
மார்க்கத்தை அல்லது வணக்க வழிபாடுகளைப் புரிந்து கொள்வதில் ஏற்படுகின்ற கொள்கை ரீதியான முரண்பாடுகளே இந்தப் பிரிவுகள். ஒருவர் ஒரு விஷயத்தை சரியாக விளங்குகிறார், மற்றவர் அதனைத் தவறாக விளங்குகிறார்; இதன் காரணமாக அவர்கள் தனித்தனி குழுக்களாக இருக்கிறார்களே தவிர, இது ஒருபோதும் ஜாதி அடிப்படையில் அமைந்த பிரிவினை அல்ல. இது ஒரு ஜாதிப் பிரச்சனையாக இருந்திருந்தால், "நீ தாழ்ந்த ஜாதி, உனக்கு பக்கத்தில் இருந்து நான் சாப்பிட மாட்டேன்" என்றோ, "படைப்பு ரீதியாகவே நான் உயர்ந்தவன், நீ தாழ்ந்தவன்" என்றோ ஒரு உணர்வு வந்திருக்க வேண்டும். இஸ்லாத்தில் அப்படி எந்தவொரு உணர்வும் கிடையாது.
உதாரணமாக, தலித் சமூகத்தைச் சேர்ந்த ஒரு சகோதரர் இஸ்லாத்தை ஏற்றுக் கொள்ளும் போது, அவர் தாழ்ந்த ஜாதியிலிருந்து வந்தவர் என்பதற்காக அவருடன் சேர்ந்து அமர்ந்து சாப்பிடக் கூடாது என்று எந்தவொரு முஸ்லிமும் கூறுவதில்லை. அந்த நபர் இஸ்லாத்தின் சரியான கொள்கையை ஏற்றுக் கொண்ட அடுத்த கணமே அவர் நமது சகோதரராக மாறிவிடுகிறார்.
முஸ்லிம்களுக்கு மத்தியில் ஏற்படும் சண்டைகளும் முரண்பாடுகளும் கொள்கை ரீதியானவையே. இஸ்லாத்தின் பெயரால் ஷிர்க் (இணைவைப்பு) செய்கின்றவர்கள் செய்யும் தவறுகளை நாம் எதிர்க்கிறோம்; அதற்காக அவர்கள் நம்மை மிரட்டலாம் அல்லது சண்டை பிடிக்கலாம். அதேபோன்று "நீ அந்த ஊர், நான் இந்த ஊர்" என்று ஊர்ப் பெருமைக்காகச் சில சண்டைகள் வரலாம். இவைகள் எல்லாம் கொள்கைப் பிரச்சனைகளே மற்றும் ஊர்ப் பிரச்சனைகளே தவிர, ஒருபோதும் தாழ்ந்த ஜாதி, உயர்ந்த ஜாதி என்ற அடிப்படையில் உருவான ஜாதிச் சண்டைகள் அல்ல என்பதை உறுதியாகப் புரிந்து கொள்ள வேண்டும்.