வலீமா என்பது நிக்காஹ் முடித்தவர் "வலீமாவுக்கு வாருங்கள்" என்று எந்த விருந்துக்கு அழைக்கிறாரோ அதுதான் வலீமா. அங்கே சோறு, பால், பிஸ்கட் என எது வைக்கப்பட்டிருந்தாலும் அழைப்பவரின் நிய்யத்தைப் (எண்ணத்தைப்) பொறுத்துதான் அது வலீமாவாக அமையும். நிக்காஹ் நடக்கும் போது குறிப்பிட்ட சில உறவினர்களையும் முக்கியஸ்தர்களையும் மட்டும் அழைத்து, அவர்களைக் கௌரவிப்பதற்காக ஒரு சாப்பாடோ அல்லது டீ பார்ட்டியோ கொடுத்தால் அது வலீமா ஆகிவிடாது.
அவர் அதனை "திருமண விருந்து" என்று சொல்லாமல், மறுநாள்தான் வலீமா என்று அனைவரையும் அழைத்தால், அந்த மறுநாள் விருந்துதான் உண்மையான வலீமா ஆகும். நிக்காஹ்வின் போது விருந்தளித்தால் அடுத்த நாள் வலீமாவுக்குப் போகக்கூடாது என்று நாமாகவே மார்க்கத்தில் வரம்புகளை மீறிச் சட்டங்களை உருவாக்கக் கூடாது. அவருக்கு எந்த நாளில் வலீமா கொடுக்க வேண்டும் என்று நிய்யத் இருக்கிறதோ அதில் அவர் தாராளமாக உணவளிக்கலாம்.
ஆனால், வலீமா என்ற பெயரில் இல்லாமல், பெரிய கல்யாணச் சாப்பாடு கொடுத்து முடித்த பிறகு, மார்க்கப் பற்றுள்ளவர்களைக் கூப்பிடுவதற்காக மட்டும் தனியாக ஒரு 50 பேரை வலீமா என்று கூப்பிட்டால் அது மார்க்கத்தின் பெயரால் செய்யப்படும் ஒரு ஏமாற்று வேலை; அது நையாண்டிக்குரியது, அதற்குப் போகக்கூடாது. மற்றபடி, அவர் எந்த நிய்யத்தில் வலீமா என்று அழைக்கிறாரோ அதை ஏற்றுச் செல்வதில் மார்க்க ரீதியாக எந்தத் தவறும் இல்லை.