ஒரு பெண்ணைப் பொறுத்தவரையில் அவள் இருக்க வேண்டிய பாதுகாப்பான இடமாக இஸ்லாம் வீட்டையே அடையாளப்படுத்துகிறது. "நீங்கள் வீடுகளிலேயே இருந்து கொள்ளுங்கள்" என்று அல்குர்ஆன் கட்டளையிடுகிறது. அதேபோல, ஒரு பெண் மஹ்ரமான (திருமணம் முடிக்கத் தடை செய்யப்பட்ட) உறவின் துணையின்றி நீண்ட பயணம் செல்வதை நபி (ஸல்) அவர்கள் வன்மையாகத் தடை செய்துள்ளார்கள்.
இந்த அடிப்படையில், ஒரு பெண் தொழில் செய்வதற்காக வேண்டி மஹ்ரமான துணை இல்லாமல் வெளிநாடுகளுக்குப் பயணம் செல்வது இஸ்லாத்தில் தடை செய்யப்பட்ட (ஹராமான) ஒன்றாகும். பெண்களை இவ்வாறு வெளிநாடுகளுக்கு அனுப்புவதனால் சமுதாயத்தில் பல சீர்கேடுகளும், பாதுகாப்பு அற்ற சூழ்நிலைகளும் ஏற்படுகின்றன என்பதை நாம் அனுபவபூர்வமாக அறிந்துள்ளோம். கணவன்மார் மனைவிமாருக்குக் கொடுக்க வேண்டிய உரிமைகளைக் கொடுக்காமலும், குழந்தைகளுக்குச் செய்ய வேண்டிய செலவுகளைப் பொறுப்பேற்காமலும் இருப்பதனாலேயே இவ்வாறான சீரழிவுகள் ஏற்படுகின்றன.
இருப்பினும், ஒரு பெண் அவ்வாறு வெளிநாடு சென்று அங்கு கஷ்டப்பட்டு ஹலாலான தொழில்களைச் செய்து சம்பாதித்தால், அந்த வருமானம் அவளுக்கு ஹலாலானதாகவே அமையும். ஆனால், மஹ்ரமின்றி அவள் மேற்கொண்ட அந்தப் பயணம் ஹராமானதாகும் என்பதைப் புரிந்து கொள்ள வேண்டும்.