உளூ செய்வது இஸ்லாத்தில் மிகத் தெளிவாக அடையாளப்படுத்தப்பட்டுள்ளது. ஒருவர் பூரணமாக உளூ செய்த பிறகு 'ஹுஃப்' என்று சொல்லக்கூடிய தோலால் செய்யப்பட்ட சாக்ஸை அணிந்திருந்தால், பின்னர் உளூ முறியும்போது மீண்டும் கால்களைக் கழுவாமல் அந்த ஹுஃபின் மேற்பகுதியில் தண்ணீரைத் தொட்டு தடவிக் கொண்டால் போதுமானது. இதற்கு 'மஸஹ் செய்தல்' என்று பெயர். இதில் அறிஞர்களிடையே எவ்விதக் கருத்து வேறுபாடும் கிடையாது. நூலால் அல்லது பருத்தியால் (Cotton) செய்யப்பட்ட சாக்ஸ்கள் தடிப்பமானதாகவும், காலைப் பூரணமாக மறைக்கக்கூடியதாகவும் இருந்தால் அவற்றின் மீதும் மஸஹ் செய்யலாம் என்பதே சரியான கருத்தாகும்.
ஷூவின் மீது மஸஹ் செய்வதைப் பொறுத்தவரையில், சாக்ஸ் அணிந்த நிலையில் ஷூ அணிந்திருந்தால் அந்த ஷூவிற்கு மேலால் மஸஹ் செய்யலாம் என்று பெரும்பாலான உலமாக்கள் கருதுகின்றனர். அதேபோன்று, சாக்ஸ் அணியாமல் நேரடியாக ஷூ அணிந்திருந்தாலும், அந்த ஷூ காலை முழுமையாக மறைக்கக்கூடிய (Full Shoe) வடிவமைப்பில் இருந்தால் அதன் மீதும் தாராளமாக மஸஹ் செய்யலாம் என்பதே சரியான கருத்தாகும். ஆனால், கால் வெளிப்படையாகத் தெரியக்கூடிய 'ஹாஃப் ஷூ' (Half Shoe) அணிந்திருந்தால் அதன் மீது மஸஹ் செய்ய முடியாது.
மஸஹ் செய்வதற்கு முன்னால், கால்களைக் கழுவி பூரணமாக உளூ செய்த பின்னரே ஷூ அல்லது சாக்ஸை அணிந்திருக்க வேண்டும் என்பது கட்டாய நிபந்தனையாகும். இவ்வாறு மஸஹ் செய்த ஒருவர் பள்ளிவாசலுக்குள் நுழையும்போது ஷூவைக் கழற்றினால் அவரது உளூ முறியுமா என்பதில் கருத்து வேறுபாடுகள் உள்ளன. இமாம் இப்னு தைமியா (ரஹ்), இமாம் இப்னு ஹஸ்ம் (ரஹ்) போன்ற அறிஞர்களின் வலுவான கருத்தின்படி, மஸஹ் செய்த பின்னர் ஷூவையோ சாக்ஸையோ கழற்றுவதனால் உளூ முறியாது. அலி (ரலி) அவர்கள் மஸஹ் செய்துவிட்டு, பள்ளிவாசலுக்குள் நுழையும்போது செருப்பைக் கழற்றிவிட்டுத் தொழுதார்கள் என்ற செய்தியும் இதற்கு ஆதாரமாக உள்ளது. உளூ முறியும் என்பதற்கு எவ்விதத் தெளிவான ஆதாரமும் இல்லை என்பதால் இந்தக் கருத்தே வலுவானதாகும்.