இஸ்லாத்தில் சுயஇன்பம் காண்பது ஹராமா?

இஸ்லாத்தில் சுயஇன்பம் காண்பது ஹராமா? எனக்கு ஒரு கேள்வி உள்ளது, அதைக் கேட்க எனக்கு வெட்கமாக இருக்கிறது. ஆனால் சமீபத்தில் இஸ்லாத்திற்கு வந்த ஒரு சகோதரி இதற்கான விடையை அறிய விரும்புகிறார். என்னிடம் அதற்கான பதில் (குர்ஆன் மற்றும் சுன்னாவின் ஆதாரங்களுடன்) இல்லை. நீங்கள் இதற்கு உதவுவீர்கள் என்று நம்புகிறேன். இது பொருத்தமற்ற கேள்வியாக இருந்தால் அல்லாஹ் என்னை மன்னிப்பானாக; ஆனால் முஸ்லிம்களாகிய நாம் அறிவைத் தேடுவதில் ஒருபோதும் வெட்கப்படக்கூடாது. அவருடைய கேள்வி: “சுயஇன்பம் காண்பது இஸ்லாத்தில் அனுமதிக்கப்பட்டதா?” என்பதாகும். அல்லாஹ் நம் அனைவருக்கும் அறிவை அதிகப்படுத்துவானாக! பதிலின் சுருக்கம்: இஸ்லாத்தில் ஆண்களும் பெண்களும் சுயஇன்பம் காண்பது ஹராம் (தடுக்கப்பட்டது) ஆகும். இதற்கு குர்ஆன் மற்றும் சுன்னாவில் தெளிவான ஆதாரங்கள் உள்ளன. சுயஇன்பப் பழக்கத்தைக் கைவிடுவதற்கான 13 ஆலோசனைகளை விரிவான பதிலில் காணவும். பதில்: இஸ்லாத்தில் சுயஇன்பம் ஹராமா? ஆண்களும் பெண்களும் சுயஇன்பம் காண்பது இஸ்லாத்தில் ஹராம் (தடுக்கப்பட்டது) என்பதற்கு பின்வரும் ஆதாரங்கள் உள்ளன: குர்ஆனிலிருந்து சுயஇன்பத்திற்கான தடை இமாம் ஷாஃபிஈ ரஹிமஹுல்லாஹ் அவர்கள் பின்வரும் குர்ஆன் வசனங்களின் அடிப்படையில் சுயஇன்பம் ஹராம் என்று கூறுகிறார்கள் (வசனத்தின் கருத்து): “மேலும் அவர்கள் (எத்தகையோர் என்றால்) தங்களது மறைவிடங்களைப் பேணிப் பாதுகாத்துக் கொள்வார்கள். ஆனால், அவர்கள் தங்களது மனைவிகளிடமோ அல்லது தங்களது வலது கரங்கள் சொந்தமாக்கிக் கொண்டவர்களிடமோ (நடந்து கொள்வது) தவிர; (அதில்) அவர்கள் நிந்திக்கப்பட்டவர்கள் அல்லர். எனவே, யார் இதற்கு அப்பால் (வேறு வழியைத்) தேடுகிறார்களோ அவர்கள் தாம் வரம்பு மீறியவர்கள்.” (அல்-முஃமினூன் 23:5-7) மனைவி அல்லது வலது கரம் சொந்தமாக்கிக் கொண்டவர்கள் (அடிமைப் பெண்கள்) தவிர மற்ற அனைத்து முறையற்ற பாலியல் செயல்களையும் (சுயஇன்பம் உட்பட) தடை செய்வதில் இந்த வசனங்கள் தெளிவாக உள்ளன. யார் இதற்கு அப்பால் தேடுகிறார்களோ அவர்கள் வரம்பு மீறியவர்கள். சில அறிஞர்கள் இந்த வசனத்தையும் ஆதாரமாகப் பயன்படுத்துகின்றனர் (வசனத்தின் கருத்து): “திருமணம் செய்து கொள்வதற்குரிய நிதி வசதிகளைப் பெற்றுக் கொள்ளாதவர்கள், அல்லாஹ் தனது அருளினால் அவர்களுக்குச் செல்வாக்கை அளிக்கும் வரை தங்களைப் பேணிப் பாதுகாத்துக் கொள்ளட்டும் (கற்பு நெறியைக் கடைப்பிடிக்கட்டும்).” (அந்-நூர் 24:33) திருமணம் செய்ய நிதி வசதி இல்லாதவர்கள், அல்லாஹ் அவர்களுக்குத் தன் அருளால் வழிவகுக்கும் வரை தங்களைப் பாதுகாத்து, பொறுமையுடன் இருக்குமாறு இந்த வசனம் கட்டளையிடுகிறது. சுன்னாவிலிருந்து சுயஇன்பத்திற்கான தடை அப்துல்லாஹ் இப்னு மஸ்ஊத் ரலியல்லாஹு அன்ஹு அவர்கள் அறிவிக்கிறார்கள்: “நாங்கள் வாலிபர்களாக, எந்தச் செல்வமும் இல்லாத நிலையில் அல்லாஹ்வின் தூதர் ஸல்லல்லாஹு அலைஹி வஸல்லம் அவர்களுடன் இருந்தோம். அப்போது அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் கூறினார்கள்: ‘வாலிபர்களே! உங்களில் எவருக்குத் திருமணம் செய்ய சக்தி இருக்கிறதோ அவர் திருமணம் செய்து கொள்ளட்டும். ஏனெனில் அது பார்வையைத் தாழ்த்தச் செய்யும்; மறைவிடத்தைப் பாதுகாக்கும். யாருக்கு அதற்குச் சக்தி இல்லையோ அவர் நோன்பு நோற்கட்டும். ஏனெனில் அது அவரது இச்சையைக் கட்டுப்படுத்தும்.'” (ஆதாரம்: ஸஹீஹுல் புகாரி: 5066) இந்த ஹதீஸ், திருமணம் செய்ய முடியாதவர்களை (அவர்கள் சிரமப்பட்டாலும்) நோன்பு நோற்குமாறு கட்டளையிடுகிறது. சுயஇன்பம் காண்பது மிக எளிதான விஷயமாக இருந்தாலும், அதைச் செய்யுமாறு அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் கூறவில்லை. சுயஇன்பப் பழக்கத்தைக் கைவிடுவதற்கான ஆலோசனைகள் இந்த வழக்கத்தை குணப்படுத்த அல்லது சிகிச்சை அளிக்கப் பின்வரும் பரிந்துரைகளை நாங்கள் வழங்குகிறோம்: * இந்தப் பிரச்சனைக்குத் தீர்வு காண்பதற்கான ஒரே நோக்கம் அல்லாஹ்வின் கட்டளைக்குப் பணிவதும், அவனது தண்டனைக்குப் பயப்படுவதும் மட்டுமே இருக்க வேண்டும். * இந்த வழக்கத்திற்கு விரைவான மற்றும் நிரந்தரத் தீர்வு: வசதி வந்தவுடன் விரைவாகத் திருமணம் செய்து கொள்வதாகும். * இந்த சிந்தனைகளில் இருந்து, வஸ்வாசில் இருந்து விலகி உங்களை எப்போதும் மறுமைக்கும் இம்மைக்கும் பயன்தரும் நற்செயல்களில் பிஸியாக வைத்துக் கொள்ளுங்கள். ஏனென்றால் அத்தகைய சிந்தனைகள், செயல்களாக ஆகும், செயல்கள் பழக்கத்தை ஏற்படுத்தும். * பார்வையைத் தாழ்த்திக் கொள்ளுங்கள் (ஆபாசப் படங்கள், வீடியோக்கள் போன்ற தடை செய்யப்பட்டவற்றைப் பார்ப்பதைத் தவிர்த்தல்). இது ஹராமான காரியங்களுக்கு இட்டுச் செல்லும் இச்சையைக் கட்டுப்படுத்த உதவும். “நம்பிக்கையாளர்களான ஆண்களிடம் அவர்கள் தங்களது பார்வைகளைத் தாழ்த்திக் கொள்ளுமாறும், தங்களது மறைவிடங்களைப் பாதுகாத்துக் கொள்ளுமாறும் கூறுவீராக. அது அவர்களுக்குப் பரிசுத்தமானதாகும். அவர்கள் செய்வதை அல்லாஹ் நன்கறிவான். நம்பிக்கையாளர்களான பெண்களிடமும் அவர்கள் தங்களது பார்வைகளைத் தாழ்த்திக் கொள்ளுமாறும், தங்களது மறைவிடங்களைப் பாதுகாத்துக் கொள்ளுமாறும் கூறுவீராக…” (அந்-நூர் 24:30-31) அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் கூறினார்கள்: “தற்செயலாக விழும் பார்வையைத் தொடர்ந்து மீண்டும் பார்க்காதே” (திர்மிதி: 2777). இச்சைகளை தூண்டக் கூடிய அனைத்து இடங்களில் இருந்தும் விலகி இருப்பதும் அவசியம். * உங்கள் ஓய்வு நேரத்தை அல்லாஹ்வின் வணக்கத்திலும் மார்க்க அறிவை வளர்ப்பதிலும் செலவிடுங்கள். * இச்செயலினால் ஏற்படும் கண்பார்வை குறைபாடு, நரம்புத் தளர்ச்சி அல்லது முதுகு வலி போன்ற மருத்துவப் பாதிப்புகளைப் பற்றி எண்ணுவது. எல்லாவற்றிற்கும் மேலாக, ஒவ்வொரு முறையும் குளிக்க (குஸுல்) வேண்டிய கட்டாயத்தால் ஃபர்ளான தொழுகைகள் விடுபடும் அபாயத்தை உணருங்கள். * விபச்சாரம் அல்லது ஓரினச்சேர்க்கை போன்ற பெரும் பாவங்களிலிருந்து தப்பிக்க சுயஇன்பம் ஒரு அனுமதி என்ற ஷைத்தானின் மாயையை நம்பாதீர்கள். * மன உறுதியை வளர்த்துக் கொள்ளுங்கள். ஷைத்தானிடம் சரணடையாதீர்கள். “யாரும் தனிமையில் இரவைக் கழிக்க வேண்டாம்” என அல்லாஹ்வின் தூதர் ஸல்லல்லாஹு அலைஹி வஸல்லம் எச்சரித்துள்ளார்கள் (அஹ்மத்: 6919). * மேலே குறிப்பிட்ட ஹதீஸின்படி நோன்பு நோற்பது, இந்த விடயத்துக்கான தீர்வாகும். அதே சமையம், இந்த செயலை மீண்டும் செய்ய மாட்டேன் என்று சத்தியம் செய்வது போன்ற தீவிர செயல்களை செய்யக் கூடாது. ஏனென்றால், சத்தியம் செய்த பின் ஒருவர் அதை மீண்டும் செய்தால், சத்தியத்தை மீரியவர் ஆவார். அதே போன்று பாலியல் இச்சைகளை குறைக்க மருந்துகளை எடுப்பதை தவிர்க்க வேண்டும், அதனால் பக்க விளைவுகள் வரும் வாய்ப்புகள் உள்ளன. மேலும் பாலியல் இச்சைகளை முழுமையாக நீக்கும் மருந்துகள் ஹரமாகும். * உறங்குவதற்கு முன் ஓத வேண்டிய துஆக்களை ஓதி, வலது பக்கம் சாய்ந்து படுக்கவும். குப்புறப் படுப்பதைத் தவிர்க்கவும் (அல்லாஹ்வின் தூதர் ஸல்லல்லாஹு அலைஹி வஸல்லம் இதனைத் தடுத்துள்ளார்கள்). * பொறுமையுடனும் கற்புடனும் இருக்கப் போராடுங்கள். “யார் கற்பைப் பேணுகிறாரோ அவரை அல்லாஹ் கற்புள்ளவராக ஆக்குகிறான்” (புகாரி: 1469). * ஒருவேளை இந்தப் பாவத்தில் விழுந்துவிட்டால், உடனே அல்லாஹ்வின் மன்னிப்பைக் கோரி தவ்பா செய்யுங்கள். நம்பிக்கையிழப்பது பெரும் பாவமாகும். * இறுதியாக, அல்லாஹ் மிகக் கருணையாளன். அவனிடம் அழுது முறையிட்டு உதவி தேடுங்கள், அவன் நிச்சயம் பதிலளிப்பான். மூலம் : https://islamqa.info/en/answers/329/is-masturbation-haram-in-islam மொழிபெயர்ப்பு : Islamqatamil Admin Team